ఓ రాజా! విరుద్దాలైన మారుమాటలు ఎందుకు? ఈ పుత్రుడిని కౌగిలించుకొని ఈతడి కౌగిలివలన కలిగే సుఖాన్ని అనుభవించుము. ముత్యాలహారాలూ, పచ్చకర్పూరపు దట్టమైన పొడి ప్రసారం, మంచి గంధమూ, వెన్నెలయూ – జీవులకు పుత్రుని కౌగిలివలె మనసుకు సుఖాన్నీ, మంచి చల్లదనాన్నీ కలిగించలేవు.

నన్నయ శబ్ద శిల్పానికి సంబంధించిన గుణం అక్షర రమ్యత. ఆయన కేవలం నాద సౌందర్యానికి మాత్రమే ప్రాధాన్యత ఇవ్వకుండా రసానుగుణమైన అక్షరాల కూర్పుకు పెద్దపీట వేయడం వల్ల అక్షర రమ్యత ఈ పద్యంలో పరిపూర్ణంగా వికసించింది.

సంస్కృత భారతంలో లేని వస్తు సందోహాన్ని నన్నయ ఈ పద్యంలో ప్రయోగించాడు. వ్యాసుడు శకుంతల వాక్యాలలో ధ్వనిస్తాడు; రుషి వంటి నన్నయభట్టు ఆమె మాటలలో నానారుచిరార్థ సూక్తినిధిగా దర్శనమిస్తాడు. "పుత్రగాత్ర పరిష్వంగం" గొప్పతనం తెలుగు సాహిత్యంలో అజరామరంగా నిలిచింది.